تأثير الأخضر على النفسية

اللون الأخضر بيفكرك بلون الخضرة والطبيعية والهواء النقي، بمجرد ما تشوف أي حاجة باللون الأخضر نفسيتك تتحسن لأنه لون بيأثر في الأعصاب ويخليك تهدي لو عندك ضغط معين فيريح أعصابك، كمان بيديك شعور بالأمل، وبيرتبط دايماً بإنه لون الحياة علشان كدا بيحفز الناس على الشغل.

دا غير إنه بيأثر بشكل إيجابي في علاج مرضى السرطان، كمان بيسكن الآلام والأوجاع، وخاصة وجع المعدة والإضطربات العصبية الإنفعالية، ودا بقى من أكتر الألوان المريحة للعين والأعصاب، وخاصة الدرجة البيستاچ(الأخضر المصفر) منه بتهدي الأعصاب وبتدمج بين مميزات اللون الأصفر والأخضر للعين بشكل ممتع، وهو مناسب لأي حاجة في الديكور ولأي أوضة وبيدي إحساس بالحرية والراحة وبيقلل من الإحساس بالضغوطات اليومية.

اللون الأخضر بيتوسط اللون الأصفر واللون الأزرق فكل ما كانت درجته مايلة للون الأزرق كل ما كان بيدل على الهدوء والإسترخاء والحكمة وبياخد مواصفات الألوان الباردة زي إنها بتوطي الضغط وتقلل من معدل ضربات القلب، ولو درجته مالت أكتر للون الأصفر بياخد روح الألوان الدافية ويساعد على النشاط والحيوية ومشاعر التفاؤل، فيعتبر من الألوان المميزة لأنه بيجمع بين خواص الألوان الدافية والألوان الباردة دا غير إنه للون مُريح للعين لأنه بينفذ ليها بسهولة.

في مجال الدعاية كمان هتلاقي إن الأخضر مميز جداً لأنه تقريباً بيمشي مع كل المجالات عادي، فلو عندك منتجات مُكونة من عناصر طبيعية أياً المنتجات دي إيه فاللون الأخضر أنسب اختيار للتعبير عن المنتجات دي لأنه جاي من الطبيعية زي المنتجات، كمان لو عندك محل بتقدم فيه منتجات أو خدمات أو حتى مطاعم وعايز الناس تقضي فيه وقت أطول من المعتاد فعليك وعلى اللون دا لأنه بيساعد في الاسترخاء وعلشان كدا هتلاقي الناس مش عايزة تمشي من عندك، ومن أشهر البرندات اللي بتستخدم اللون الأخضر : البنك الأهلي وستاربكس وجمعية مصر الخير.