كيف تؤثر ألوان الديكور على النفس؟

الألوان هي الحاجة الوحيدة اللي بتطاردنا في حياتنا وهتلاقيها في كل حتة حواليك، ممكن تلاقي لون بيأثر عليك بالسلب في الشكل وبشكل تاني يأثر إيجابي، عندك مثلاً اللون الأسود في اللبس لو لقيت واحد لابسة إسود في أسود هتلاقي نفسك تلقائي أخدت إنطباع عن إنها حزينة أو بتمر بحالة اكتئاب، نيجي بقى للديكور هتلاقي فيه الأسود رمز الفخامة والأناقة والرُقي، مهم جداً نعرف تأثير الألوان في كل شئ في حياتنا، لأن الألوان لوحدها كفيلة تغير ليك مزاجك تماماً من الأسوء للأفضل والعكس، وعلشان الألوان حوالينا في ديكور كل مكان بندخله فلازم نعرف عن تأثير ألوان الديكور على نفسيتنا

اللون الزهري:-

من أفضل الألوان اللي بتساعد على راحة العضلات، ويعتبر بردو مهدئ للأشخاص العصبيين اللي بيميلوا للعنف، لأنه لون مريح للعين وبيدل على الراحة والهدوء، وفي تجربة اتعملت علشان يقيسوا مدى تأثير اللون الزهري على الناس ،استبدلوا لون قسم المرور من جوا باللون الزهري، والنتيجة كانت إن كل ما واحد عنده مخالفة كان بيدخل مدايق ومتعصب لما بيشوف اللون دا بيستغرب الأول وبعد كدا يسألهم عن اللون لدرجة إن بعض الناس نسيت إنها كانت رايحة تدفع مخالفة من إنبهارهم باللون وفيه اللي دفعها وهو مبسوط وقلت نسبة عصبية الناس وهما بيدفعوا لدرجة كبيرة، بسبب تأثير اللون الزهري

اللون الأحمر

يعتبر اللون دا من الألوان الدافية والقوية اللي بتأثر على نفسية الناس تأثير مباشر، ولأنه بيزيد من معدل ضغط الدم وسرعة دقات القلب وعلشان كدا فالمحبة والعاطفة عنوان للون، وبيفضل استخدامه في إكسسوارات أوض النوم وأوضة السفرة والمطابخ، دا غير إن اللون دا بيساعد على الشعور بالجوع وبسبب كدا معظم المطاعم المشهورة كانت بستخدمه في الديكور بتاعها علشان تزيد من نسبة مبيعاتها زي مطعم ماكدونالدز وكنتاكي و Pizza hut

اللون الأزرق

لون البحر والهدوء والراحة والإستجمام وكل حاجة مريحة للأعصاب، وبيساعد على خفض الضغط ويقلل من ضربات القلب، ويفضل استخدام الدرجات الفاتحة منه لأنها بتحسن المزاج جداً وبتدي شعور بالراحة، وينصح بإستخدامه في أوض النوم والحمامات والأفضل تجنبه في أوضة السفرة أو المطابخ

اللون الأخضر

ودا بقى من أكتر الألوان المريحة للون والأعصاب، وخاصة الدرجة البيستاچ منه بتهدي الأعصاب وبتدمج بين الأصفر والأخضر بشكل ممتع، وهو مناسب لأي حاجة في الديكور ولأي أوضة وبيدي إحساس بالحرية والراحة وبيقلل من الإحساس بالضغوطات اليومية

اللون الأصفر

بيزود من الثقة بالنفس، وبيدي شعور بالنشاط والمرح والبهجة ويعتبر اختيار كويس للمطابخ وأوض السفرة والحمامات بس مينفعش في أوض الأطفال لأنه بيأثر على أعصابهم

اللون البنفسجي

من الألوان اللي بتدل على الرومانسية وهو بيدي عمق في الشكل البيت وبيدي إحساس بالبهجة والأطفال بتحبه جداً على عكس الناس الكبيرة في السن وبيفضل استخدامه في إكسسوارات البيت