نصائح لشراء ماكينة خياطة

أسعار الهدوم بقت غالية جداً ومكلفة وصعب تشتري كل اللي نفسك فيه بسبب الأسعار دي، أو لو أنتي محجبة ومش لاقية هدوم تناسب ذوقك والحجاب في نفس الوقت والموضوع أصبح أزمة، يبقى أفضل حل إنك تتعلمي الخياطة وتفصلي كل هدومك لنفسك أو حتى لو حابة يكون ليكي دخل تقدري تعمليا عن طريق تفصيل الهدوم، خليني أقولك بعض النصايح علشان تاخدي بالك وأنتي بتشتري:

 •اختاري ماكينة تناسب احتياجاتك وفي نفس الوقت تكون كويسة

معروف إن ماكينات الخياطة سعرها بيبدأ من أول 400 جنية لحد 5000 جنية أو أزيد ودا طبعاً بيتحدد على حسب نوع وجودة الماكينة، فالأفضل إنك تختاري ماكينة ليها اسم بحيث توفر عليكي تكاليف الأعطال أو التلفيات، كمان لو أنتِ عايزة الماكينة في الاستخدامات البسيطة زي إنك تصلحي أو تخيطي هدوم ليكي ولأهلك فأناي محتاجة ماكينة بسيطة وعادية وبالتالي سعرها هيكون محدود، أما لو كنتي حابة تفتحي مشروع وهتعملي شغل كتير فالأفضل إنك تشتري ماكينة متطورة واللي فيها إضافات أكتر زي التطريز والرسم والسرفلة وغيرهم.

• اختاري نوع منتشر وسهل التصليح

كل ما تختاري نوع منتشر كل ما تكون صيانته متوفرة وسهلة، بحيث لو حصل عطل أو تلف في الماكينة تعرفي تصلحيها وتلاقي ليها قطع غيار، وطبعاً من الأفضل إنك تشتري ماكينة جديدة، لأن المستعملة غالباً بتتباع بسبب عُطل فيها، فبدل ما تصرفي عليها فلوس تصليح كتير أحياناً قد تكون أكتر من سعر ماكينة جديدة اشتريها جديدة من الأول ووفري وقتك ومجهودك في إنك تشتغلي عليها.

•اشتري ماكينة خياطة منزلية وافحصيها قبل ما تشتريها

فيه نوعين من ماكينات الخياطة وهي المنزلية والصناعية، فالأفضل لو أنتِ مبتدأة إنك تشتري ماكينة منزلية لأن الصناعية بتكون أفضل من حيث الأداء والإمكانيات بس صعب التعامل معاها بالنسبة للمبتدئات، ولازم تفحصي الأجزاء المهمة في الماكينة قبل ما تشتريها زي المكوك والموتور والإبرة وتتأكدي إنها تتحمل الشغل لفترات طويلة ودا غالباً متوفر في الماكينات الياباني والألماني والأمريكي.

•أفضل ماركات ماكينات الخياطة

زي ما قولنا الماكينات الياباني أفضل بكتير من الصيني وفيه أسامي معروفة وبتتميز بجودتها العالية زي السينجر والبرذر وجوكي، وطبعاً الماكينات الحديثة أفضل من القديمة، بس أقل جودة في النوع وقوة الموتور وتحمل ضغط الاستخدام.

كمان كل ماكينة ليها تعليمات تشغيل معينة لازم تتعرفي عليها قبل ما تشتري الماكينة وتستعيني بفني محترف يشرحلك كل جزء فيها واستخداماته والأعطال اللي ممكن تحصلها بحيث تتجنبي معاناة الاستخدام لأول مرة.