الإقناع(فن الفوز بما تريد)

"يأتي الحب عندما يتوقَّف التلاعب بالمشاعر؛ عندما تفكِّر في الطرف الآخر أكثر مما تفكر في رد فعله تجاهك؛ عندما تجرؤ على الكشف عن نفسك بالكامل؛ عندما تجرؤ على أن تكون ضعيفاً "

بدأ "ديف لاكاني" فصله الأول في كتاب "الإقناع" بجملة شهيرة للدكتورة "چويس براذرز"،الجملة دي فيها استفهامات كتيير، زي إيه هو التلاعب؟ وإيه هي أساسيات التلاعب؟ وإيه علاقته بالإقناع؟ طب إزاي أعرف إن الشخص اللي قدامي بيتلاعب بيا؟؟؟؟؟؟؟؟؟؟؟ 

علامات إستفهام كتير مش واضحة خلينا  نتكلم فيها :

- التلاعب : هو إنك تتحكم في شخص تحكُم فيه ذكاء أو خداع، وخاصة علشان تحقق مصلحة شخصية"، التلاعب سبب من أسباب الإقناع ولكنه سبب غير محبب خالص، لأنك بتخدع الشخص اللي قدامك بأساليب خفية وذكية وأحياناً كتير بتكون غلط علشان تأثر عليه وتقنعه بحاجة لمصلحتك علشان تكسب النقاش أو تكسب فلوس أو أياً كان السبب، بس الإقناع مش الهدف منه الخداع ولا المصلحة، غالباً بيكون هدفه الوصول لرأي مناسب ليك أنت والطرف التاني

الإقناع: " هو التعجيل  على إنك تبدأ شغل معين أو إنك تتبنى وجهة نظر عن طريق النقاش أو المنطق أو الإستعطاف"

- الفرق بين التلاعب والإقناع هو إن في التلاعب أنت هدفك توصل لنتيجةأو هدف شخصي في مصلحتك من ما تشوف نتيجة أو تأثير دا في الشخص اللي قدامك إيه، لأن الخداع أو إخفاء الأدلة المنطقية والواقعية أحد أسباب التلاعب، ببساطة لأني الحقيقية والوضوح هيديلك مساحة كافية إنك تاخد قرار صح، لكن التلاعب هيأثر عليك ويخليك تاخد قرار سريع وغلط لمصلحة الشخص اللي قدامك، إنما الإقناع فيه فرصة كبيرة إن الطرفين يوصلوا لرأي أو حل مناسب ليهم هما الإتنين يقدروا يتفاهموا ومحدش يطلع خسران ومفيش مصلحة لحد أو هدف شخصي يخليك تإذي الشخص اللي قدامك علشانه سواء نفسياً أو جسدياً زي التلاعب، و زي ما فيه تلاعب سلبي فيه تلاعب إيجابي دا قليل ولكن زي ما قولنا غالباً التلاعب بيبقى سلبي 

* التلاعب الإيجابي:-

 

زي ما قالت عالمة النفس الشهيرة "أنچيلا ديلي" : إن التلاعب بيتحدد إذا كان سلبي أو إيجابي عن طريق نية الشخص الملاعب، التلاعب الإيجابي زي إن قولت لطفل معاه كيس مليان بسكويت ناوي ياكله كله قبل ما ينام، إن في إمكان ياكل قطعة واحدة أو مياكلش بسكويت خالص، فطبيعي الطفل واختار ياكل قطعة واحدة فأنا كدا خلقت عنده وهم الإختيار بس في حدود مقبوله، أنت كدا اتلاعبت بسلوك الطفل، في صالحه علشان يعرف ينام كويس

 

* التلاعب السلبي:-

 

أغلب الناس بيظهر معاها التلاعب السلبي دا لما يقرروا يشتروا عربية مستعملة، فتيحي الصبح قاعد مع مراتك بتفطروا وبتتناقشوا في موضوع إنكم تشتروا عربية أحدث من اللي معاكم بس في نفس الوقت مش عايزين تصرفوا فلوس كتير على عربية جديدة تماماً موديل السنة دي وبعدها يلفت إنتباهك إعلان وأنتوا بتتكلموا في موضوع العربية، من واحد بيبيع عربيات مستعملة ويقول إنه في اليوم الفُلاني عاملين خصم كبير على سعر العربيات علشان عندهم مخزون كبير من العربيات المستعملة وعايزين يتخلوا منها، وخسارتنا مكسب ليك "ويعملك البحر طحينة زي ما بنقول"، وألحق العرض، ويبدأ ينفذ عليك شروط التلاعب الأساسية

 

الشرط الأول :-

علشان أنت ذكي هتقول لمراتك "مفيش مانع أروح وأبص بصة على العربيات بما إن عندهم تخفيض، هو ميقدرش يقنعني أشتري حاجة مش عايزاها"، ودا أول أسلوب للتلاعب إنه يقنعك بحل لمشكلة عندك ولأنك بتدور على حلها فعقلك هيبدأ يتقبل الموقف، بعدها أول ما تروح يفرجك على العربية ويفضل يتكلم معاك علشان يعرف أنت بتدور عليه ويذكر ليك 4 عروض مميزة واحد منهم قريب من إختيارك ولأنه عرف أنت بتدور على إيه فتلاقيه بيذكر ليك المميزات اللي بتدور عليها وبعدها يدخل على اللي بعده

 

الشرط التاني:-

 

حساسية الوقت : كلنا عندنا حساسية تجاه الوقت وخاصة لما يبقى مطلوب منك تاخد قرار سريع في وقت قليل، وزي ما كلنا عارفين الطير اللي بيجي بدري هو اللي بياخد كل حاجة، وهنا بيبدأ التلاعب بإنه يأكد على حساسية الوقت ويزيد في الضغط عليك ودي أكتر حاجة بتخلي الناس تاخد قرارات متهورة، ودا بيظهر في إنه يقولك " دا فيه عميل تاني عجبته العربية دي وقرر يشتريها دلوقتي، ولازم تلحق يا فندم لأن العميل التاني لو جه في أي وقت بالفلوس لازم أخلص معاه"، وهنا ندخل على الشرط المدمر

 

الشرط التالت :-

احتمالية الخسارة : وهنا عقلك بيرتبك ويضغط ما بين مميزات العربية وسعرها وبين إنك احتمال تخسرها لو العميل التاني جاب الفلوس بسرعة وجه ،فتبدأ تفكر  إزاي تاخدها وفي نفس الوقت ميضحكش عليك، بس للأسف إنبهارك بالتفاصيل دي كلها هيحطك في وش المدفع وإنك تسلم زمام أمورك ليه ومتبقاش عارف تعمل إيه

 

الشرط الرابع :-

 

الالتقاء بخبير خيِّر : يبدأ هنا يخيرك اختيارات حلوة ويقولك "إنك لو اشتريت العربية دي هتاخد معاها كاوتش هدية أو مشغل CD" فتبدأ الخيارات دي تزغلل عينيك وتقع ضحية ليه وتوافق،وبكدا يكون هو نفذ أساليب التلاعب عليك ويؤسفني أقولك إنه هو اللي كسب في الموضوع دا

 

خلينا نتفق إن الموضوع منتهاش على كدا لأنك مجرد ما تشتري العربية هتبدأ تكتشف فيها عيوب متتلاحظش في 10 دقايق التجربة اللي سوقتها فيهم لما روحت تشتريها، بس الموضوع بيتكشف بسرعة والإعلام ومواقع التواصل كلها بيتكلموا عن إن الشركة الفلانية فاسدة وبتتلاعب بالناس، وهنا الموضوع ينتشر في ثواني فيتاخد قرار صارم من الحكومة تجاه الشركة دي، فالموضوع يتقفل بسرعة، ولكن في نفس الوقت لازم نبقى حريصين إن التلاعب دا ميوصلناش 

https://www.pdf-books.org/book/%D8%AA%D8%AD%D9%85%D9%8A%D9%84-%D9%83%D8%AA%D8%A7%D8%A8-%D8%A7%D9%84%D8%A5%D9%82%D9%86%D8%A7%D8%B9-%D9%81%D9%86-%D8%A7%D9%84%D9%81%D9%88%D8%B2-%D8%A8%D9%85%D8%A7-%D8%AA%D8%B1%D9%8A%D8%AF-%D9%8A%D9%81-%D9%84%D8%A7%D9%83%D8%A7%D9%86%D9%8A.html

لينك الكتاب pdf علشان تعرف عن التلاعب أكتر