مفاتيح النجاح

"انظر حولك ولاحظ عدد الأشخاص الذين حققوا أهدافهم فقط 3%"

- كان فيه بحث اتعمل في جامعة (Yale University) علشان يحددوا نسبة الناس اللي بتحقق أهدافها فعلاً ويوصلوا ليها، واكتشفوا إن عدد الناس دي 3% بس من الناس اللي اتعملت عليهم التجربة،ممكن الرقم دا يخليك تبقى محبط وعندك يأس، ودا طبيعي لأنك لما تسمع إن الدراسة دي اتعملت في بلد أجنبية متقدمة وكان الناتج 3% بس، يبقى احنا كعرب كام!!!، بس دا يخليك تسأل نفسك سؤال هل أنت من ال 3% دول ولا من ال 97% الباقيين ؟

في فيلم "البحث عن السعادة" كان ويل سميث شغال مندوب مبيعات، وكان بيشتغل بجهده كله، بس بسبب إن المنتج اللي بيبيعه كان سعره عالي بالإضافة إنه منتج جديد، ومحدش بيشتريه غير الدكاترة، فكانت حالته المالية صعبة بسبب قلة المبيعات، وفي يوم من الأيام وهو معدي من تحت مبنى تجاري ضخم، شاف الناس وهي بتدخل المبنى دا وهما في قمة السعادة، ولابسين الهدوم الغالية،وعربياتهم آخر موديل، هما دول ال 3% من الناس اللي بتحقق أهدافها وتوصل لحلمها وبقيت ال 97% شغلهم يحققوا أهداف ال 3%، فشوف أنت عايز تبقى أنهي واحد فيهم، هل الشخص اللي بيحقق أهدافه وأحلام نفسه ولا الشخص اللي بيساعد غيره يوصل للهدف دا

خلينا نفترض افتراض وهو إنك بتقعد على مواقع السوشيال ميديا ساعتين يومياً بحد أقصى(مع إن دا مبيحصلش بس دا مجرد افتراض) وساعة تتفرج على برنامج أو أي حاجة بتحبها، بمعدل 3 ساعات يومياً بترفهه عن نفسك، يعني 90 ساعة في الشهر، وفي السنة 1080 ساعة، ولما نقسم الرقم دا على 8 اللي هما عدد ساعات العمل الرسمية، فهتكتشف أنك بتقضي في السنة الواحدة 135 يوم مبتعملش حاجة، حوالي تلت السنة ضايع في حاجة لا هتفيدك في إنك تبني مستقبلك ولا هتساعدك تحقق أحلامك، وفي نفس الوقت اللي أنت بتضيع فيه عمرك في السوشيال ميديا مثلاً، أنت هنا بتحقق نجاح كبير للبرامج دي وللناس اللي عاملينها، فهنا هتبقى من ال 97% اللي بيحققوا أهداف غيرهم

والحل هنا هو إنك تحط هدفك قدام عينيك وتركز عليه بشتى الطرق وتعافر علشان توصله كويس، وعلشان تعرف هدفك وتحدده الأول، لازم تجرب كل حاجة وأي حاجة ساعتها هتعرف أنت عايز إيه ومش هتبقى تايهه،لكن لو معملتش دا هتفضل واقف مكانك بتضيع في حياتك وعمرك على حاجة مش مفيدة، في سباقات الجري وألعاب القوة والمسابقات دي كلها هتلاقي الشخص اللي بيقول إنه واثق إنه كان هيكسب لأنه حاطط هدفه من الأول على الكأس وإنه كان واثق إنه هيحققه، فعلشان توصل لهدفك فعلاً لازم تكون مؤمن بيه، ساعتها هتبقى من ال 3%