العلاج عن طريق الخياطة

جربتي تتعالجي بالخياطة قبل كدا!!

- سمعنا كتير عن العلاج بالدوا والعلاج عن طريق الحجامة والعلاج بالأعشاب لكن موضوع الخياطة جديدة دي,تعرفي إن الخياطة زي الكروشية والتريكو و الأميجورمي الحاجات دي كلها ليها فوايد صحية كتير وأنتي مش عارفة, تعالي نعرف كام فايدة صحية ليهم كدا 

1 - منع الإكتئاب

هتلاقي نفسك مشغولة دايماً وإنتي بتخيطي وبتعدي الغُرز وتشوفي فاضل كام وعملتي كام وتشتغلي عليهم كويس فبالتالي نسبة تفكيرك في أي حاجة تدايقك تكاد تكون منعدمة لأنك مش مركزة مع حد غير الغُرز دي وإزاي تظبطيها فعقلك مشغول تماماً وبيبقى نشط لأقصى درجة علشان ميغلطش غلطة واحدة ومفيش مجال ليه يفكر في أي حاجة تانية وبالتالي لما بتروحي تشتغلي في الكروشية هتلاقي نفسك ساعات بتنسي اللي حواليكي والوقت وتركزي مع الكروشية وبالتالي ده بيخليكي تدخلي تحديات مع نفسك في الموضوع دا فثقتك بنفسك تزيد ويبقى من الصعب إنك تُصابي بالإكتئاب

2- الإسترخاء وتقليل الضغط

معظم الناس بتستخدم الكروشية والتريكو كأداة بيخرجوا بيها الطاقة السلبية اللي جواهم وكأنهم مع كل غُرزة بينتقموا من شخص دايقهم أو أثر على نفسيتهم بالسلب، وفي الولايات ولما قرروا يعملوا أبحاث على ناس بتشتغل في صناعة النسيج إن أكتر من نص الناس اللي اتعمل عليها البحث قالوا إن صناعة النسيج بتخليهم مبسوطين جداً و بتساعدهم على الإسترخاء والتخلص من التوتر وده بيخليهم مبدعين أكتر واكتشفوا في البحث ده إن الناس اللي بتشتغل في صناعة النسيج كتير بيكونوا هاديين ومبسوطين بحياتهم ونسبة إصابتهم بالقلق والحزن مش كبيرة وعندهم تقدير للذات أكتر من غيرهم

 

3 - بتقلل من نسبة إصابة الأشخاص بمرض الزهايمر

شئ بسيط زي الأعمال اليدوية فيه منفعة كبيرة وهو إنه بيحافظ على ذاكرتك ويقويها وبيبقى من الصعب إنك تنسي لأن التدريب عليها بيساعد على تقوية الذاكرة وإنها بتنشط أجزاء معقدة في المخ وأكتر تأثير من مضادات الإكتئاب اللي بيوصفها الدكاترة ،والتمارين البدنية والذهنية اللي بيبذلها الجسم والمخ في الأعمال اليدوية بتخلي دماغ الإنسان أكتر مرونة ويتحمل ويعرف يخرج من المواقف فده يطور منك بسرعة

 

4- الإبداع

في كتاب "ابق عقلك على قيد الحياة" وضح لورنس كاتز إن الحالة العقلية للإنسان بتتدهور مش بسبب موت الخلايا ولكن بسبب إن مفيش اتصال بينهم ووضح إن الفنون بتساهم في اتصال الخلايا دي ببعضها، لأن الأعمال اليدوية والفنون ملهاش حل واحد عكس الرياضيات اللي مينفعش ليها حلين علشان كدا هي بتشجع التفكير الإبداعي وإنك توصلي لحلول فريدة وجديدة، كمان إنك تشتغلي في مجموعات وتشاركوا شغلكم مع بعض دا بيكون روابط اجتماعية أكتر وبيزيد من شعورك بالرضا، اللي بيحفز العقل للإبداع

 

5 - معرفة عيوبك وحلها

هتلاقي الناس الخبيرة في المجال ده بترشحلك فنون معينة علشان تواجه بيها مواقف وعيوب في شخصيتك، فمثلاً الخياطة بكل أنواعها زي الكروشية والتريكو و التطريز بتساعدك على التغلب عل مخاوفك، والماندلا بتساعدك إنك تستوعب بسرعة وبتزيد من قدرتك على التفاهم، فإنت بتجمع من كل فن حاجة وتاخد مميزاته وتحل عيوبك بيه