فن الأميجرومي

- في 2018 فن الكروشية اكتسح الشاشة وكان الراعي الرسمي لشغل الهاند ميد كله، الغريب إنه مش البنات لوحدها اللي كانت بتدور على الكورسات الأون لاين أو حتى الأوف لاين علشان يتعلموا الكروشية لا كمان كان فيه شباب كتير متابعين كورسات الكروشية وأخدوها واتعلموه كويس ووصلوا فيه لمرحلة الإحتراف ونزلوا اكتسحوا سوق الهاند ميد بشغلهم في  الكروشية، واتحول الكروشية من مجرد عادة عند الستات زمان يشتغلوا بيه وقت فراغهم ويصمموا هدوم لأولادهم لمهنة بيشتغلها  ناس كتير علشان توفرلهم فلوس يعرفوا يصرفوا بيها على نفسهم وكمان في نفس الوقت يمارسوا هواية هما بيحبوها

 

 بس كان فيه نوع من أنواع الكروشية هو اللي واكل الجو أوي والناس منبهرة بيه والإقبال عليه كان عالي جداً من جميع فئات الناس وأعمارهم في السن مختلفة ولكن لكونه فن مبهج وجميل وهو فن "الأميجرومي"

تعالو نتعرف بقى على الأميجرومي 

 

بالنسبة للأطفال فأكتر حاجة بيحبوها جداً العرايس واللعب وأي حاجة فيها أشكال جديدة عليهم تحديداً ومن هنا بتيجي فكرة فن الأميجرومي وهو فن بيرجع أصله لليابان وعلشان كدا فهو فن ياباني (واسمه بالياباني: 編みぐるみ) كلمة أميجرومي عبارة عن دمج لكلمتين، الأولي " أمي" ومعناها كروشيه أو التريكو، والتانية "جورومي" واللي معناها عروسة فيها حشو ، والمقصود بمعنى الكلمة إن هو فن صناعة المجسمات المحشوة عن طريق الكروشية، وشغله بيكون عبارة عن  العرايس المجسم المحشية وأشكال تانية زي الحيوانات والأشكال الكرتونية والجماعات زي الطيارة والسفينة والعربية من الآخر كدا هو فن المجسمات وبيكون شكلها حلو وفي نفس الوقت صغيرة  وسهل حشوها، الأميجرمي سهل مش صعب ولكنه زيه زي أي فن ليه أُسس وقواعد

 

* أساسيات الأميجرومي :-

 

- تعرفي أشكال الإبر وأنواعها

- إن فيه جزئيات بتختلف عن بعضها في نوع الخيط المصنوعة بيه، فلازم تعرفي تفرقي بين نوع الخيوط وأشكالهم

-تعرفي تفرقي بين جودة الخيوط ودي نقطة مهمة جداً

- إن غرزة السلسلة والحشو أساس أي شغل ليكي

- إيه هي الألوان اللي تنفع تعملي بيها البشرة علشان تبان بأكبر قدر إنها حقيقية

- لازم تعرفي العرايس بتتحشي إيه، وغالباً أغلب المجسمات بتتحشي فايبر

- أهم حاجة كمان تعرفي إزاي تربطي أجزاء الشخصية ببعض

- إنك تعرفي تجيبي العيون اللي تليق مع كل مجسم وتعرفي تربطيها كويس، أو لو هتطرزيها إزاي تظبطيها

- تعرفي إزاي تقرأي الباترونات الإنجليزي

- مهم جداً إنك تعرفي أنواع وأحجام وأشكال الأسلاك اللي هتستخدميها في شغلك

- وتعرفي إمتى تركبي العروسة شعر وإمتى تعمليه بالخيط

- وإزاي تسعري شغلك لو حابة تبيعي

دي كلها أساسيات الأميجرومي اللي لازم تبقي عارفاهم كويس علشان شغلك يطلع مظبوط