موضة 2019 في عالم الديكور

إتعرف علي الديكور النيوكلاسيك الموضة الأكثر انتشاراً في 2019 , النيوكلاسيك عبارة عن دمج كلمتين اللي هما New واللي هو جديد أو عصري وclassic يعني تقليدي أو قديم يعني بإختصار كدا الموضة السنة دي من الديكور بتدمج بين الإستايل الحديث والتقليدي في نفس الوقت, وعلشان نعرف أكتر الموضة دي شكلها بيبقى عامل إزاي ,خلينا نوضح الطراز التقليدي والطراز الحديث وإيه هو الفرق بينهم !!

الطراز الكلاسيك(التقليدي):
هو طراز فيه روح الجو القديم ومن اسمه فهو تقليدي ومفيش جديد في أشكاله ومعظم ديكوراته بيبقى نفس الفكرة والإستايل , بداية الطراز ده كانت في القرن ال 18 وبيعبر عن المظهر البريطاني والفرنسي وكمان الحضارة العربية القديمة,وبيدل على الهدوء والأناقة

*مواصفات الطراز التقليدي :-

- قطع الأثاث بتاعته تقليدية(بتبقى دائرية أو فيها انحناءات كتير)
- ترتيب الأثاث والأباجورات واللوح وغيرهم بيبقى منظم بشكل معين ومقابل لبعضه
- ألوانه بتكون غالباً من درجة البرونز والبيج والبُني العسلي وبيميل أكتر للألوان الدافية, والخشب الغامق بيبقى كتير في النوع ده 
- القماش فيه بيبقى متزخرف بالورود بطريقة مبالغ فيها
- الإكسسورات بتبقى كتيرة وليها مكانة في الأثاث زي استاند الشموع والفازات والبراويز المطلية باللون الدهبي
- بيندرج تحت الطراز التقليدي الطراز الفرنسي والطراز الفيكتوري

*الطراز العصري(الحديث):
وواضح من اسمه إن الطراز ده لسه جديد,لأنه بدأ من بعد الثورة الصناعية ومع بداية القرن العشرين علشان كده هو جديد,الإستايل بيعبر أكتر عن جيله,جيل الإختراعات والإبتكارات الحديثة,ومع إن الطرازده حديث إلا إنه مش مبالغ فيه ,وبيدل بردو على الهدوء والشياكة

*مواصفات الطراز العصري(الحديث):-
- ساعات كتير بيجي بألوان هادية بتجمع بين اللون الأبيض والأسود(زي كتير من الديكورات التركي) أو الأبيض والفضي وساعات بيجي بألوان مطرقعة وحيوية زي الأزرق والنبيتي والأخضر والأحمر

- بيبقى الحديد المستخدم فيه كتير والخشب قليل
- اللي بيميز الطراز العصري إن الأثاث بتاعه غريب وفيه تفاصيل جديدة ومميزة,زي ترابيزة شكلها غريب أو لوحة برسمة مش مفهومة أو أباجورة ليها تصميم مبتكر
- بيدي إحساس بوسع المكان والمساحات الفاضية الكتير
- قطع الأثاث بتيجي بزوايا قوية ,زي الترابيزات بتيجي مربعة أو مستطيلة (مفيهاش إنحناءات ولا أشكال دائرية)
- بيتميز إن الإكسسورات بتاعت الأثاث قليلة وممكن يكتفي بفازة أو لوحة واحدة وخلاص
- الأقمشة بتاعته بتكون سادة

*الطراز النيوكلاسيك بيجمع بين مواصفات الطراز التقليدي والعصري بحيث يناسب جميع الأزواق وفي نفس الوقت بيدي شكل جديد بروح مختلفة وجميلة وبيكون فيه تفاصيل كتير مختلفة عن بعضها وفي نفس الوقت بتكمل بعض ,ويعتبر الطراز ده فريد من نوعه لأنه دمج مواصفات كتير بشكل متناسق ومختلف