تعرف على نمط ديكورك

- تفتكر إيه اللي بيقولوا الديكور عن طبقات المجتمع المختلفة؟,ويعني إيه أساساً ديكور؟

الديكور : هو الفن اللي بيزين الحتت الفاضية من الأوضة بحيث يكون شكلها مُعاصر وجذابة لأي حد يشوفها وكمان يكون شكلها متناسق ومناسب مع الهندسة المعماري للمكان وجميل وبتعبر عن شكل الناس اللي ساكنة جواها, وكمان بيشمل الدهانات والأرضيات والسقف واختيار الأثاث علشان شكلهم يبقى متناسق وبيحكي قصة المكان ده وتاريخه

 

فتلاقي مثلاً قصور الملوك الديكور فيها بيبقى كلاسيكي وبيعبر عن الفخامة والقوة والصرامة وقد إيه الناس دي أهم حاجة عندها الشغل والنتيجة وتلاقي دايماً ألوان الديكورات بتاعتهم بتميل للألوان الغامقة دليل على عدلهم واستعدادهم في أي وقت للحرب والموت، تخيل بقى إن ده كله بيقوله ديكور!!! 

 

 والڤلل بتاعت الفئة الأقل من الملوك هتلاقي فيها تحف وأنتيكات والأثاث اللي فيها جاي من الدول الأوروبية وبيتغير كل فترة بحيث يتماشى مع الموضة في الديكور ده دليل على الترف والرفاهية وقصة وصول الناس للمكانة دي ازاي واهتمامهم بالشكل والشغل اللي بيكمل الشكل أكتر حاجة

وبالنسبة للطبقة المتوسطة اللي بيبقوا مجرد ناس عاديين، ديكور شقتهم بيدل على مجهود الناس دي وتعبها في إنهم يفضلوا محافظين على مستواهم ده علشان يعرفوا يعيشوا وغالباً الديكور بيبقى محلي ويدوب بيكونوا قادرين على إنهم يغيروا أي حاجة باظت في الديكور أو يجددوها، كمان ديكورهم بيدل على إن الناس دي ناس بتحاول تحافظ على مستواهم ويكملوا حياتهم وبيدل على إنهم كل يوم بيعيدوا حساباتهم لحاجات كتير علشان يعملوا حاجة تنفعهم لو حصلهم مشكلة في المكان اللي بيدخلهم منه عائد مادي

نوصل بقى للطبقة الآخيرة، ودول بقى الناس اللي بيوتهم على الطوب الأحمر أو حتى عايشين في أوضة، الناس اللي الفقر بيحفر اسمه في كل حتة من أركان المكان اللي هما عايشين فيه، الناس دي بقى بتعافر بس علشان تعيش بس وغالباً هتلاقي الأثاث بتاعهم متهالك ده لو كان فيه أثاث والديكور هو الطوبة الحمرا، ده كله بيدل على بساطة الناس دي ومحاولتهم إنهم يلحقوا أي فرصة في الحياة علشان يعيشوا وروح المثابرة عندهم عالية