تأثير الأحمر في النفسية

أشهر لون في الألوان كلها وأكثرهم انتشاراً و استعمالاً من غيره وهتلاقيه موجود في كل مكان حواليك بدرجاته المختلفة، الأحمر لون الدم والنار وهما من الألوان الدافية والقوية واللي بتدل على الشجاعة والعاطفة والحب والسرعة والخطر والحركة ولون الطاقة،علشان كدا نقدر نقول إن لا يخلوا مكان من اللون الأحمر

في الطبيعية زي الورود والفواكه زي التفاح والفراولة والرمان والتوت وغيرهم والخضار زي الطماطم  من الفواكه اللي بلون الأحمر واللي مفيدة جداً للقلب وفيها ڤتامين C وبتمنع من السرطانات وأمراض كتير

وفي البيوت هتلاقيه موجود في الديكور زي الأثاث والدهانات والأرضيات واللي على الأقل لازم يبقى فيه جزء كبير منه بالأحمر لأنه لون بيدل على النشاط والحيوية، فمجرد ما تبقى تعبان أو حاسس بالكسل وتشوف اللون الأحمر عقلك تلقائياً بينشط وبيتجاهل التعب دا وعلشان كدا مصممين الديكور مش بينصحوا إن أوضة النوم تبقى باللون الأحمر لأن اللون دا بينقل ذبذبات عالية بتنشط حركة العقل والجسم وأنت نايم فجسمك بدل ما يكون في وضع راحة ويرتاح ينشط وأنت نايم فتلاقي عندك صداع أو أرق دايماً وتشوف كوابيس، علشان كدا يُفضل إنه ميكونش في نفس المكان اللي بتنام فيه، ممكن تستخدمه في الصالون لو عندك عيوب فيها لأنه لون ملفت للإنتباه، فيلفت إنتباه الناس ليه بعيداً عن العيوب التانية

معظم البراندات والشركات والمطاعم الكبيرة بتحط اللون الأحمر في اللوجو بتاعها لأنه بيعتبر أفضل لون في التسويق، فعندك شركة كوكاكولا شعارها باللون الأحمر لأنه لون بيدل على الطاقة والنشاط كذلك هما استخدموا اللون دا علشان يقولولك إن المشروب بتاعهم دا مشروب الطاقة والنشاط، مطعم ماكدونالدز اللوجو بتاعه وديكور معظم الفروع بتاعته باللون الأحمر لأنه بيفتح النفس على الأكل ويخليك تجوع وعلشان كدا هتلاقي المطاعم اللي كدا نسبة أرباحها عالية 

اللون الأحمر من الألوان المميزة جداً واللي بتلاقيها في أي مكان وبتجدد النشاط والحياة، فجددوا نفسيتكم كمان بالأحمر