موضة 2019 في عالم الأزياء

موضة السبعينات والتمانينات رجعت تاني بقوة السنة دي بالأكتاف العريضة والألوان المشجرة والهدوم اللي بتلمع والحاجات بتاعت زمان خلينا نتعرف عليهم

 

نقشة جلد الأفعى :

تشكيلة كبيرة من معظم الهدوم  والشنط والأحذية كانت منقوشة بنقشة جلد الأفعي علشان شكلها المختلف والجديد كان عامل كبير إنه يجذب الناس ليها واللي بيختلف شكلها بإختلاف نوع الجلد اللي اتعملت بيه والقماش كمان فيه منها الشيفون أوالحرير أو القطن وغيرهم كتير من أنواع الأقمشة, ونزلت النقشة دي في الفساتين والبناطيل والقمصان والجواكت,كمان مكنتش مقتصرة النقشة دي على فئة معينة زي البنات أو الشباب كانت لكله, للولاد والبنات والأطفال والشباب والكبار, ويمكن دا اللي كان سبب في إنها تبقى مميزة جداً عن غيرها من الصيحات  اللي نزلت السنة دي

الكروشية :

 

دايماً الكروشية بيفكرنا بأمهاتنا وجداتنا لما كانوا بيقعدوا يصمموا لينا الهدوم ويتعبوا فيها بحب وكأنهم بيصمموا لينا جزء منهم مش مجرد خيط وبس, ورجع ليه إطلالة خاصة السنة وخاصة الهدوم الصوف علشان تدفي في الشتا وفي نفس الوقت بتصاميم ورسومات جديدة تخلي شكلها مناسب في 2019

الألوان النيون :

 

الألوان النيون بتبقى ألوان مبهجة وجميلة وعلشان كدا رجعت اكتسحت الموضة وعلى الرغم إن فيها ألوان بتبقى مزعجة للعين إلا إن فيه منها الألوان الهادية شوية اللي بتدي شعور بالنشاط والحيوية في المكان وبتسيب تأثير على الناس بالإيجاب, تقدري تضيفيها للألوان المحايدة زي الأبيض والأسود والرمادي والبيج, كمان تقدري تضيفيها لإكسسوراتك