ما هو التصوير الفوتوغرافي؟

 كلنا بنبقى فاهمين إن علشان أنا الواحد يصور كويس لازم يبقى معاه كاميرا إحترافية وخلاص الموضوع انتهى على كدا، بس الحقيقة إن الموضوع مش مقتصر خالص على الكاميرا الإحترافية، هي ليها أهمية وأهمية كبيرة كمان بس في نفس الوقت في أسرار في التصوير وخطوات لو مشيت عليها تقدر تطلع صورة حلوة بكاميرا 2 ميجا بيكسل، أنت متخيل الرقم 

 

* خلينا نعرف الأول يعني إيه تصوير وبعد كدا ,أقولك إزاي تطلع صورة حلوة بأقل إمكانية

التصوير(photography) :

عبارة عن تقنية بتسجل صورة كائن حي أو جماد من خلال الضوء أو الإشعاع على مادة حساسة للضوء,وكلمة فوتوجرافي أصلها يوناني  (photos) معناها الضوء و (graphein) معناها الرسم,وأول واحد أخترع كاميرا علشان التصوير العالم ابن الهيثم بس كانت علشان دراسة البصريات

• السؤال اللي كلنا بنسأله دايماً لنفسنا إيه هي أسباب إن الصور تطلع حلوة زي الناس المحترفة ؟

 

1- أول حاجة مراعاة العوامل الأساسية للصورة: يعني لازم أبقى عارف كويس ايه اللي أركز عليه، وإيه اللي أوضحه وإيه اللي يبقى مش باين، الموضوع إيه زي الكاتب كدا بالظبط هو اللي بيكتب المقالات والكتب مش القلم، يعني لو الشخص اللي بيصور مظبط العوامل اللي حواليه كويس الصورة هتطلع حلوة

 

2- الإضاءة: ودي أهم حاجة في التصوير كله لأن التصوير أصلاً معتمد على الإضاءة، والإضاءة أنواع، فيه الأضاءة الإستديو ودي لما تصور في أوضة أو استديو تصوير أو مكان فيه معدات إضاءة كهربية، في الحالة دي إنت تقدر تتحكم في مصدر الضوء وقوته وشدته واتجاهه، بس في نفس الوقت محتاجة خبرة في التعامل، وفيه الإضاءة المنتشرة ودي بتبقى نوع من الضوء بيكون منتشر على كل أجزاء الحاجة اللي عايزة أصورها، والإضاء الخارجية اللي بتبقى في ضوء الشمس، وفيه الإضاءة الثلاثية ودي بتبقى إضاءة بتعتمد على 3 مصادر للضوء، مصدر أساسي ومصدر ضوء خلفي ومصدر ضوء جانبي، النوع دا من الإضاءة بيساعد إنك تطلع صورة كويسة من حيث الضوء والظل وإنك توضح الحاجة اللي عايز تصورها بقدر الإمكان

 

3- الزوايا :ناس كتير بتبقى فاهمة إن الأشخاص اللي عايشين في دول أوربية أو بلد الأماكن الطبيعية اللي فيها كتير دا بيساعدهم على تظبيط الزوايا والصور، الأماكن الطبيعية بتدي منظر حلو ولكن مش هي كل حاجة ولو الزوايا في التصوير ش حلوة المكان ممكن يكون حلو جداً بس مش حلو في الصورة، علشان الصور تطلع كويس محتاجة ظبط زوايا، لأن الزاوية لو مش مظبوطة الموضوع هيسبب مشكلة كبيرة في الصورة وهتطلع مش حلوة أو مش واضحة أو ظاهرة تفاصيل كتير مش محتاجينها، تخيل إنك لو واخد صورتين كل واحدة من زواية مختلفة عن اللي قبلها ممكن المنظر شكله يتغير

4- الإنسجام : وهو إن الصورة كلها تبقى مترابطة ومتوافقة مع بعضها، يعني الصورة والطقس والخلفية كله بيكمل بعضه, وكل ما كانت الصورة متوافقة ومنسجمة مع بعضها أكتر كل ما كانت الصورة أجمل و أفضل من غيرها

 

 

5 - التزييف : مش شرط علشان المنظر يبقى محتاج مطر نسيبه لحد ما الدنيا تمطر ويا نعرف ناخد الصورة يا لأ، في حين إنك تزيف المطر ويبقى شكل الصورة زي ما أنت عايز، بمعنى إنك تِخلق الجو اللي يوصل للناس إنك عايش اللحظة والموقف، حتى لو مكنش واقعي