7 شخصيات تسمم حياتك

هنتكلم النهاردة عن تاجر بس المرة دي مش بيبيع شئ مادي ولا مقابل فلوس، لأ دا بيبيع شئ معنوي ومؤذي جداً وهو اللوم، الشخص اللوام بيتاجر في الشعور بالذنب وإنه يحسس اللي قدامه إن أي حاجة تحصل تبقى نهاية العالم خلاص، حتى لو الحاجات اللي بتحصل دي أنت ملكش دعوة بيها أو خارجة عن التحكم، وهو شاطر جداً في إنه يملى فيك طاقة سلبية وإحباط، بحيث إنك تبقى زيه وتبدأ معاه مشوار من اللوم والنكد والحياة السلبية، لمجرد إنك تشبع غريزته في كونه يشوف الناس محبطة وعندها طاقة سلبية علشان ميبقاش لوحده

لو ليك واحد صاحبك لوام وجيت عرضت عليه تروحوا تاكلوا في مطعم حلو وأنتوا رايحين في الطريق الدنيا بقت زحمة وكنتوا هتتأخروا على الخروجة، فهتلاقي صاحبك اللوام دا بيلومك ويقولك مكنش لازم نخرج النهاردة، أو كان ممكن نتفق في على يوم تاني بدل الجو الزحمة دا، ويقعد يجيب عليك اللوم ويقولك أنت عارف إني بتخنق من الزحمة وعملت فيا كدا، أنت عارف إن الجو حر ومع ذلك صممت ننزل علشان أنت عايز تتفسح وخلاص لكن أنا مش مهم وهكذا، دايماً كدا هتلاقيه بيلوم على حاجات خارجة عن إرادتنا وعن إرادة أي حد، لكن هو لازم يحسسك بالذنب

 

اللوام تاجر وطول الوقت بيعمل معاك صفقات وأنت مش واخد بالك، وكأنه بيوجهلك رسالة خفية بعد كل موقف يقولك فيها  "أنت مديون بإنك خليت مزاجي وحش لأن الدنيا مطرت" أو "لأن الدنيا كانت زحمة"، ولما يقولك "أنا ضحيت بحياتي علشانك" فهو يقصد إن زي ما أنا ضحيت بحياتي علشان فأنت كمان مدين ليا بحياتك، ويفضل يعد عليك ديونك بعد كل موقف علشان يطالبك إنك تسدد في يوم من الأيام، نقطة قوة اللوام إنك بتبقى حساس تجاه اللوم دا، لأنك بتبقى عايز كل الناس تحسن الظن بيك

 

الحل بقى إنك تحسسه إن اللوم دا مش فارق معاك وإن كل الحاجات اللي بتحصل دي خارجة عن إرادتك وكذلك لو هو كان قرر يخرج كان مُعرض لدا عادي وتوضح ليه إن اللوم دا مش فارق معاك ولكن ممكن يخسره ناس تانية، علشان كدا لازم يلحق نفسه لأنك بتخاف عليه وبتنصحه غيرك هيسيبه ويكبر دماغه منه